Հարություն Քուշկյանի հարցազրույցը «168 ժամ» թերթին
30.05.09
ԲՀԿ-ի և ՀՀԿ-ի միջև առճակատում չկա՞
Հարցազրույց Երևանի ավագանու ընտրություններում “Բարգավաճ Հայաստան” կուսակցության ցուցակը գլխավորող Հարություն Քուշկյանի հետ
- Հիմնավորումը, թե ինչու հատկապես Ձեր թեկնածությունն առաջադրվեց ԲՀԿ-ի կողմից, այն էր, որ Դուք «քաղաքի տղա» եք, և լավ կհասկանաք` ի՞նչ է քաղաքի կառավարումը: Արդյո՞ք իրականում միայն դա էր Ձեր թեկնածության պատճառը, թե՞ այլ պատճառներ ևս կային: - Մեր կուսակցության առաջնորդը բազմիցս նշել է, թե ինչից է բխել իր այդ որոշումը: Պատճառն այն է, որ ես երկար տարիներ որպես կազմակերպիչ աշխատել եմ առողջապահական համակարգում, բայց հնարավորություն եմ ունեցել նաև ապացուցելու, որ կարող եմ տարբեր ոլորտներում ևս դրսևորել կազմակերպչի իմ ունակությունները: Եվ երևի հաշվի առնելով իմ անցած ուղին, իմ հաջողված ծրագրերի իրականացումը, ինչպիսիք են` “Էրեբունի”, ”Նաիրի” բժշկական կենտրոնները, կուսակցությունը հարմար գտավ, որ այս ընտրություններում ես գլխավորեմ ԲՀԿ համամասնական ցուցակը: Ի դեպ, պիտի ասեմ, որ կոնկրետ առողջապահական համակարգում իրականացված տարբեր բարեփոխումներ հենց իմ առաջարկություններով են ընդունվել, որոնք դրական ազդեցություն են ունեցել թե` համակարգի, թե` ընդհանրապես ազգաբնակչության համար: Այնպես որ, կարծում եմ, համադրելով թե` իմ աշխատանքի ոճը, թե` այն, որ ինձ վրա դրված ցանկացած խնդրի ես վերաբերվում եմ լրջագույն պատասխանատվությամբ, Գագիկ Ծառուկյանը կայացրել է այդ որոշումը: - Դուք կարծես թե կայացման խնդիր չունեք: Ունեք ոչ թե մեկ, այլ մի քանի բիզնեսներ, այսինքն` Ձեր կյանքը բարեկեցիկ դարձնելու խնդիր էլ չունեք: Հետևաբար, ի՞նչը ստիպեց Ձեզ մտնել քաղաքականություն: - Գիտեք, ես այն կարծիքին չեմ, թե մարդը պետք է պաշտոն ստանձնի` իր կյանքը բարեկեցիկ դարձնելու համար: Ստանձնելով այդ պատասխանատվությունը, մեր կուսակցությունն առաջնորդվում է բացառապես և միմիայն ժողովրդի շահով: Իհարկե, ես կայացման խնդիր չունեմ, և այս դեպքում դժվարն այն է, որ շատ ավելի պատասխանատու ոլորտ ես մտնում: Բայց դա մեր կուսակցության քաղխորհրդի և անձամբ պարոն Ծառուկյանի որոշումն էր, ինչն ինձ համար իսկապես մեծ վստահություն է, և քարոզարշավի այս շաբաթներին, կարծում եմ, մեզ հաջողվեց երևանցիներին համալիր կերպով ներկայացնել մեր ծրագիրն ու դատելով արձագանքներից, պիտի ասեմ, որ վստահությունը մեր կուսակցության հանդեպ օր օրի մեծանում է: Քարոզչական փուլն արդեն մոտենում է ավարտին, և ես այն գնահատում եմ բավականին արդյունավետ: - Երբ հայտնի դարձավ, որ ԲՀԿ-ն առանձին է մասնակցելու այս ընտրություններին, այսինքն` առանց կոալիցիոն ուժերի հետ դաշինք կազմելու, խոսակցություններ եղան, որ ԲՀԿ-ի մասնակցությունն այս ընտրություններին ֆարս է, և միտված է զուտ ՀՀԿ թեկնածուին աջակցելուն: Սակայն վերջին շրջանում ՀՀԿ-ի և ԲՀԿ-ի համակիրների միջև տեղի ունեցած միջադեպերը, կարծես թե փոխում են այդ տեսակետը: Ձեր կարծիքով` ինչո՞ւ նման զարգացումներ եղան, և ինչո՞ւ հենց ՀՀԿ-ի և ԲՀԿ-ի միջև ծագեցին այդ ընդհարումները: - Կոալիցիոն ուժերի միջև ոչ թե հակամարտություն կա, այլ` մրցակցություն, ինչը միանգամայն բնական և նորմալ է: Պիտի ասեմ, որ ընդհանուր առմամբ քարոզարշավն ընթանում է բավականաչափ կոռեկտ. համենայնդեպս, մենք կոռեկտության և հանդուրժողականության այն մարտավարությունը, ինչով սկսել ենք քարոզարշավը, այդպես էլ այն ավարտելու ենք: Իհարկե, ցավալի է, որ չհաջողվեց խուսափել որոշ տհաճ միջադեպերից, սակայն լուրջ չէ փորձել դրանք ներկայացնելը որպես երկու կուսակցությունների միջև առճակատում: Մեր ընտրական մշակույթը, ցավոք, դեռ այնպիսին է, որ ներքին օղակներում երբեմն հնարավոր չի լինում խուսափել տհաճ միջադեպերից: Այդուհանդերձ, վստահ եմ, որ գնալով անպայմանորեն հղկվելու է ընտրական մեր մշակույթը, և հետագայում նման երևույթներն ուղղակի բացառվելու են: Ի դեպ, երևի թե մեր տաքարյունությունն է նաև պատճառը, որ որոշ վրիպումներ լինում են: Ինչ վերաբերում է մեր մասնակցությանը, ապա իր գործունեության ընթացքում ԲՀԿ-ն ապացուցել է, որ երկրի հիմնական, առանցքային դերակատարներից է, որի ղեկավարն այսօր լուրջ հեղինակություն է ոչ միայն մեր երկրի ներսում, այլ նաև նրա սահմաններից դուրս: Մեր կուսակցությունը Գագիկ Ծառուկյանի գլխավորությամբ ունի իր ճանապարհը, իր ծրագրերը, և ես վստահ հայտարարում եմ, որ մեր քվեները միայն մերն են լինելու: Մենք մեր ծրագիրը, համամասնական ցուցակի մեր անդամներին, որոնք ի զորու են կյանքի կոչել այդ ծրագիրը` ներկայացրել ենք ժողովրդին, ու ես չեմ կասկածում, որ մայիսի 31-ին ժողովուրդը վստահության լուրջ քվե է տալու մեզ: Մեր կուսակցության նախագահը բազմիցս ասել է, այժմ էլ պիտի կրկնեմ նաև ես` մենք տեր ենք լինելու մեզ տրված յուրաքանչյուր քվեին. դրանում որևէ մեկը թող չկասկածի: - Քարոզարշավի ընթացքում` դիմելով ժողովրդին, ասում եք` ձայն տվեք Գագիկ Ծառուկյանին: Ինչո՞ւ Գ. Ծառուկյանին, երբ Դուք եք թեկնածուն: Թե՞ գտնում եք, որ այն ձայները, որ պիտի ստանաք` իսկապես ոչ թե Ձերն են, այլ` Գ. Ծառուկյանինը: - Ճիշտ եք նկատել, ես իմ խոսքի վերջում միշտ ասում եմ` վստահեք մեզ, վստահեք մեր թիմին, մեր կուսակցությանը, մեր կուսակցության առաջնորդ Գագիկ Ծառուկյանին, որովհետև, այո, ես գտնում եմ, որ մեր կուսակցության հեղինակության հիմնական և առանցքային գործոնը դա Գ. Ծառուկյանի կերպարն է, նրա անցած ուղին և այն հեղինակությունը, որ նա այսօր ունի մեր ժողովրդի մեջ: Եվ մեր կուսակցության թե` դեմքը, թե` հզորությունն առաջին հերթին պայմանավորված է մեր առաջնորդով: Այո, մենք այսօր ունենք բավականին հզոր, մեծ կուսակցություն` կադրային լուրջ պոտենցիալով, բայց շատ կարևոր է հենց կուսակցության առաջնորդի դերը, և ինքը, ինչպես տեսնում եք, անձամբ է մասնակցում քարոզարշավին, ու միշտ մեր կողքին է: Ուստի այդ պատճառով էլ ես կոչ եմ անում և միշտ էլ կոչ եմ անելու, որպեսզի առաջին հերթին վստահեն մեր կուսակցության առաջնորդին, քանզի գաղտնիք չէ, որ ասելով “Բարավաճ Հայաստան”, ժողովուրդն առաջին հերթին տեսնում է Գագիկ Ծառուկյանին, որի խոսքին և գործին վստահում է անվերապահ: Իսկ հաջողության մեր բանաձևը միշտ եղել է` ”Միասնական թիմ, միասնական պատասխանատվությունը”: - Իշխանական քաղաքական ուժերը պարբերաբար կրկնում են, թե պետք է բացառել ընտրակեղծիքները և այլն: Սակայն իրականում այսօր տեղի է ունենում հակառակը: Օրինակ, Ձեզ մեղադրում են, որ զբաղեցնելով Առողջապահության նախարարի պաշտոնը` առողջապահական հիմնարկներում վարչական ռեսուրսն օգտագործում եք ընտրություններին Ձեր ձայները ավելացնելու համար: Ի՞նչ կասեք այս մասին: - Համոզված եմ, որ վաղ թե ուշ ընտրակեղծիքներն էլ են արմատախիլ արվելու շատ պարզ պատճառով` դա մեզ ուղղակի հարիր չէ: Բացի այդ, ես չեմ պատկերացնում որևէ թեկնածուի, ով կցանկանա ընտրվել ընտրակեղծիքներով, քանզի հետագայում իր համար է դժվար լինելու աշխատելը: Երբ վստահ ես, որ քեզ ընտրել են, վստահ ես, որ ունես վստահության այդ քվեն, ապա դու ոգևորված ու պատասխանատու աշխատում ես: Իսկ եթե չունես ընտրողի վստահությունը, այլ ինչ-որ կերպ հայտնվել ես այդ պաշտոնում, ապա դու արդեն որպես մարդ հոգեբանորեն շատ ծանր վիճակում ես հայտնվում: Ինչ վերաբերում է ձեր հարցադրմանը` ընդամենը կարող եմ ասել, որ ես այսօր կարիք չունեմ բուժհիմնարկներում իմ քարոզարշավը կազմակերպելու, քանի որ բժշկական աշխարհն ինձ հրաշալի ճանաչում է. ես, արդեն 30 տարի է, այս համակարգում եմ: Այնպես որ` ես որևէ լծակ օգտագործելու կարիք պարզապես չունեմ: Ես անգամ նպատակահարմար չեմ գտել մտնել բուժհիմնարկներ և հանդիպել կոլեկտիվների հետ, որովհետև գտնում եմ, որ բուժաշխատողների շրջանում ես իմ գործունեությամբ շուրջ 20 տարի արդեն քարոզարշավ եմ անցկացնում: - Արդյոք ընտրակեղծիք չէ՞ այն փաստը, որ ԲՀԿ-ն ընտրություններից առաջ համաքաղաքային անվճար ստոմատոլոգիական կամ` անվճար դիագնոստիկ և այլ ծառայություններ է մատուցում ժողովրդին: - Նման ծառայությունները ոչ թե քարոզարշավի փուլում են իրականացվել, այլ` մեկ, մեկուկես ամիս առաջ: Ի դեպ, այդօրինակ միջոցառումներն ավանդույթ են դարձել. մենք միշտ նմանատիպ ակցիաներ անում ենք, ուստի այս տարի ևս որոշեցինք շարունակել ժողովրդանպաստ այդ ավանդույթը: Կրկնեմ` դա քարոզարշավի մեկնարկից առաջ էր, և հնչող մեղադրանքները բնավ տեղին չեն: Միգուցե դա պետք է այլ ժամկետներում իրականացնել, որպեսզի նախընտրական հնչերանգ չստանա և չշահարկվի, բայց այն, որ այդ միջոցառումներով մենք կարողանում ենք սոցիալապես անապահով, խոցելի խավին անվճար բուժծառայություն մատուցել` ես դա դրական եմ համարում: Եվ, պիտի ասեմ, որ հանրության շրջանում ևս այն մեծ ոգևորությամբ է ընդունվում: - Ձեր կոալիցիոն գործընկեր, ՕԵԿ ցուցակի երկրորդ հորիզոնականը զբաղեցնող Հենրի Բակունցի գնահատմամբ` Հյուսիսային պողոտան “քարուբետոնե սառնություն” ունի, որտեղ պակասում է կանաչ տարածություն: Դուք ի՞նչ կփոխեիք քաղաքում` ընտրվելու դեպքում, կամ` Հյուսիսային պողոտայից Ձեր տպավորությունն ինչպիսի՞ն է: - Հյուսիսային պողոտայից իմ տպավորությունն ընդհանուր առմամբ դրական է, որովհետև այն, ինչ կար, և այն, ինչ իրականացվեց` համեմատության եզրեր չունի: Դա ժամանակակից պողոտա է` ժամանակակից շինություններով: Իհարկե, ցանկալի կլիներ, որ կանաչ տարածքները շատ ավելին լինեին, որպեսզի պողոտան շնչեր: Բայց պողոտան, որպես ճարտարապետական համալիր` հաջողված է: Ինչ վերաբերում է նրան, թե ի՞նչ կփոխեի Երևանում ընտրվելու դեպքում, ապա իմ առաջնահերթ խնդիրը կլինի քաղաքացի-քաղաքապետարան հարաբերությունները նոր որակի վրա դնելը: Երևանցին պիտի վստահ լինի, որ քաղաքային իշխանությունն իր գործընկերն է: Եվ եթե մենք կարողանանք ահա ա`յդ որակի հարաբերություններ հաստատել` մնացած խնդիրները լուծելի են, եթե կա կամք, աշխատասիրությունը ու նաև, որ շատ կարևոր է` նվիրում այն գործին, ինչով զբաղվում ես:
